अक्षर अक्षर शिकूया

वाचताना वरवर सोपी वाटणारी बालकविता मुळात लिहिताना मात्र खूप अवघड असते कारण आपण ज्या वयोगटातील मुलांसाठी कविता लिहितो त्या वयोगटातील मुलांचे भावविश्व जाणून घेणे हे जसे महत्त्वाचे आहे तसेच मुलांचे भावविश्व मुलांच्याच भाषेत अगदी लयबद्ध पद्धतीने मांडणेसुद्धा तितकेच महत्त्वाचे आहे. असे झाले तरच ती कविता मुलांना आपली वाटते. हा समतोल सांभाळणे सोपे नव्हे पण जे मुलांच्या सहवासात अधिकाधिक रमतात; ज्यांना मुलांचं अवखळ मन वाचता येतं; ज्यांना मुलांची नादमय भाषा अवगत आहे; त्यांनाच ही कला अगदी छान जमू शकते. ‘लोककवी वामनदादा कर्डक आदर्श शिक्षिका’ पुरस्काराने सन्मानित झालेल्या मलेका महेबूब शेख सैय्यद यांना ही कला चांगली अवगत झाली आहे. त्या ‘अक्षर अक्षर शिकूया’ हा बालकवितासंग्रह घेऊन मुलांच्या भेटीला आल्या आहेत. हा बालकवितासंग्रह वाचताना याचा प्रत्यय आपल्याला आपसूक येतो.