प्रभातरंग

अनेक मोठमोठे ग्रंथ एकेका बैठकीत वाचून काढणारे ज्ञानसाधक, तीन-तीन तासांचा सिनेमा उत्कंठतेने पाहणारे प्रेक्षक कधी काळी आपल्याकडे होते, हे आजच्या पिढीला सांगितले तर आश्चर्य वाटावे अशी परिस्थिती आहे. अवघ्या तीस सेकंदाच्या रिल्सवर खुश होणारी पिढी कोणत्याही चांगल्या कामात काही मिनिटेही लक्ष केंद्रित करु शकत नाही. अर्थात याला काही अपवाद निश्चित आहेत मात्र बदलत्या जीवनशैलीतील हे बदल दुर्लक्षून चालणार नाही.

अशावेळी ‘रिल्स लाईफ’ आणि ‘रियल लाईफ’ यातील सीमारेषा ओळखून जीवनाच्या वेगवेगळ्या अंगांना, स्वभावाच्या पैलूंना स्पर्श करत वृत्ती आणि प्रवृत्ती अधोरेखित करणारे लेखन रवींद्र खंदारे यांनी अतिशय नेमकेपणाने केले आहे. यातून आपल्याला चांगल्या- वाईटातील फरक कळतो. ताणतणाव दूर सारले जातात. सकारात्मक वृत्ती वाढीस लागते. स्वार्थ गळून पडतो आणि ‘स्व’ अर्थ उमगतो. यातील कोणताही लेख अवघ्या अडीच-तीन मिनिटात वाचून होणार असल्याने त्यासाठी फार वेळही द्याव्या लागणार नाही. ज्यांना आपले आत्मिक बळ वाढवायचे असेल त्यांनी हे पुस्तक अवश्य वाचावे.

– घनश्याम पाटील