प्राजक्ताचे सडे

जे. डी. पराडकर यांना मी गेली अनेक वर्षे ओळखतो. अत्यंत साध्या, सरळ आणि सर्वांना कळेल अशा भाषाशैलीत जे. डी. जे लेखन करतात ते मला नेहमीच भावते. मी त्यांच्या लेखाची आवर्जुन वाट पाहत असतो. रविवारची माझी सकाळ जे. डी. यांच्या लेखनाने प्रसन्न होते. त्यांच्या लेखनाचा केवळ मीच चाहता आहे असे नव्हे तर माझ्या अभिनय क्षेत्रातील असंख्य सहकाऱ्यांना मी त्यांचे लेख पाठवत असतो आणि त्यांनाही हे लेखन आवडल्याचे अभिप्राय ते मला आवर्जून देत असतात.

जे. डी. पराडकर यांची एका शब्दावरुन लेख लिहिण्याची शैली पाहून त्यांच्या लेखणीची ताकद कळते. मला कोकण कमालीचे आवडते. जे. डी. आपल्या लेखणीतून मलाच काय, असंख्य वाचकांना कोकणचे प्रत्यक्ष दर्शन घडवत असतात. कोकणचे पर्यटन, पर्यावरण, ऐतिहासिक वास्तु, संस्कृती, चालीरीती, निसर्गातील विविध घटक यावर ते करत असलेले लेखन म्हणजे खरोखर एक दस्ताऐवज ठरतआहे.